Түркияның қор нарығындағы дауға байланысты 136 адам қамауға алынды

Редакция
20 қараша 2026, 14:20 12
Түркияның қор нарығындағы дауға байланысты 136 адам қамауға алынды Сурет авторы: depositphotos.com

Түркияда қор нарығын дүрліктірген дағдарысқа байланысты қозғалған қылмыстық іс аясында 136 күдікті темір торға тоғытылды. Бұл туралы ел президенті Режеп Тайып Ердоған парламенттегі Әділет және даму партиясы фракциясының отырысында мәлімдеді. Мемлекет басшысының сөзінше, тергеу ілігіне іліккен жалпы 500 адамның 285-іне қатысты сот бақылауы тағайындалған. Сонымен қатар ресми Анкара елдегі 131 инвестициялық қордың жұмысын тоқтату туралы шешім қабылдады.

«Ел экономикасы мен капитал нарығына қарсы ұйымдасқан түрде заңсыз әрекет еткен тұлғалар кезек-кезегімен заң алдында жауап беріп жатыр. Тергеу амалдары барынша егжей-тегжейлі жүргізілуде», - деп атап өтті Ердоған.

Қаржылық заң бұзушылықтарға қатысты басталған тексерістер бұрынғы және қазіргі жоғары лауазымды тұлғаларды да айналып өтпеді:

  • 2016–2018 жылдары Түркияның Отбасы және әлеуметтік саясат министрі қызметін атқарған Фатма Бетүл Саян Кайя капитал нарығы туралы заңнаманы бұзды деген айыппен қамауға алынды;

  • Банк қызметін реттеу және қадағалау агенттігінің екі жауапты қызметкері мен Ыстанбұл биржасының басшысы да тұтқындалды;

  • Бұдан бөлек, Ыстанбұл прокуратурасы аталған агенттіктің бұрынғы төрағасы Шахап Кавджыоғлуны тергеу қажеттігін көтерді. Жергілікті басылымдардың жазуынша, Қаржы министрі Мехмет Шимшек өткен аптада қызметінен босатылған Кавджыоғлуға қатысты ведомстволық инспекциялық басқармаға алдын ала тексеру жүргізуді тапсырған.

Еске салсақ, Түркияның қор нарығындағы дағдарыс 16 қыркүйекте Ыстанбұл биржасындағы акциялар құнының күрт құлдырауынан бастау алған еді. Осы жағдайдан соң сауда-саттық уақытша тоқтатылып, құзырлы органдар тергеуді бастап кетті.

Тергеу органдарының болжамынша, бірқатар инвестициялық қорлар мен басқарушы компанияларда өтімділік тапшылығы туындаған соң, нарықтағы дүрбелең қолдан, әдейі ұйымдастырылған. Қазіргі таңда Ыстанбұл прокуратурасы осы дерек бойынша қозғалған қылмыстық істі тергеуді жалғастыруда.