Көрсеткіш 62 пайызға өскен: Елімізде қандай қатерлі ісік түрлері жиі анықталып жатыр

Редакция
19 қараша 2026, 15:27 4
Көрсеткіш 62 пайызға өскен: Елімізде қандай қатерлі ісік түрлері жиі анықталып жатыр Сурет авторы: Deposit photos.com

Қазақстанда жыл басынан бері профилактикалық тексеруден өткен 3 миллионнан астам азаматтың 3 мыңнан астамынан қатерлі ісік анықталды. Денсаулық сақтау министрлігі соңғы тоғыз айдағы онкоскрининг қорытындысын жариялады. Ведомство мәліметінше, өткен жылдың сәйкес кезеңімен (1 862 жағдай) салыстырғанда қатерлі ісік ауруларын анықтау көрсеткіші 62 пайызға артқан.

Статистикаға сүйенсек, әсіресе тоқ ішек обыры (78,8%-ға), сүт безі обыры (58,5%-ға) және жатыр мойны обыры (57,7%-ға) жиі тіркеле бастаған. Мәселен, тоғыз ай ішінде дәрігерлер сүт безі қатерлі ісігінің 2 049 жағдайын анықтады (былтыр 1 293 болған). Сондай-ақ 5 295 адамнан ісік алды жағдайы белгілі болып, бұл көрсеткіш 2025 жылмен (3 373 жағдай) салыстырғанда 57 пайызға өскен.

Сонымен қатар тоқ ішек обырының 590 жағдайы (былтыр 330) және жатыр мойны обырының 377 жағдайы (былтыр 239) тіркелген. Мамандардың айтуынша, ауруды бірінші сатысында анықтау үлесі 70,3 пайыздан 71,6 пайызға дейін ұлғайды. Ал скринингтік жас санатынан тыс анықталатын аурулардың үлесі керісінше азайған.

Қосымша тексеруден өтетін азаматтардың да қатары көбейді. Мәселен, скрининг нәтижесі оң шыққаннан кейін колоноскопиядан өткен науқастардың үлесі 54,5 пайыздан 58,7 пайызға дейін артқан. Жалпы жыл басынан бері 3,23 миллионнан астам адам онкоскринингпен қамтылды, бұл тексерілуге тиіс халықтың 57,1 пайызын құрайды.

Денсаулық сақтау министрлігі бүгінде еліміздің 20 өңірінде орталықтандырылған скрининг жүйесі жұмыс істеп тұрғанын еске салды. Ал онкологиялық ауруға күдік туындаған науқастар үшін әрі қарайғы тексерулерден жылдам өтуге мүмкіндік беретін «жасыл дәліз» тетігі іске қосылған.