Жемқорлық күдігімен қамауға алынған «Самұрық-Қазына» қорының басшысы Нұрлан Жақыпов әзірге Қазақстан су спорты түрлері федерациясының президенті лауазымын сақтап қалады. Оның бұл қызметтегі алдағы тағдыры тек тергеу амалдары толық аяқталғаннан кейін ғана шешілмек. Бұл туралы Туризм және спорт министрі Ербол Мырзабосынов мәлімдеді.
Орталық коммуникациялар қызметінде өткен брифингте журналистер 2025 жылдың наурызынан бері федерация тізгінін ұстап келген Жақыповтың орнына кім келетінін сұраған болатын.
«Ол федерация президенті болып қала береді. Нақты шешімді тергеу жұмыстары аяқталған соң қабылдаймыз», — деп қысқа қайырды министр.
Айта кетейік, Нұрлан Жақыпов бұл орынға 2025 жылдың 28 наурызында Андрей Крюковтың орнына бірауыздан сайланған еді.
Сонымен қатар бұқаралық ақпарат құралдарының өкілдерін «Самұрық-Қазына» басшысының тұтқындалуы отандық спортты қаржыландыруға қалай әсер ететіні алаңдатты. Себебі кәсіби клубтарға бөлінетін қыруар қаржы дәл осы қор арқылы өтеді. Министрдің айтуынша, қор тарапынан бөлінетін қаражат қалыпты тәртіпте жүріп жатыр және барлық міндеттемелер орындалуда. Алайда ведомство басшысы бұл төлемдердің қалай бақыланатынын нақтыламады. Бұған дейін белгілі болғандай, 2018–2023 жылдар аралығында қор «Астана» футбол және баскетбол клубтарына, «Барыс» хоккей командасына және «Astana Qazaqstan Team» велокомандасына 138 миллиард теңге бөлген.