Шымкентте пара алған ТЖБ маманы мен пара берген департамент басшысына сот үкімі шықты

Редакция
20 қараша 2026, 17:22 7
Шымкентте пара алған ТЖБ маманы мен пара берген департамент басшысына сот үкімі шықты Сурет авторы: Informburo.kz

Шымкентте 100 мың теңге көлемінде пара алған және берген екі мемлекеттік қызметшіге қатысты сот үкімі шықты. Іс бойынша Тұран аудандық төтенше жағдайлар басқармасының бас маманы Азамат Бұлдырықов пен Халықты әлеуметтік қорғау саласындағы реттеу және бақылау комитеті департаментінің басшысы Руслан Тұңғышбаев жауапқа тартылды.

«Сот кабинеті» деректеріне сүйенсек, тексеру барысында ТЖБ маманы өрт қауіпсіздігі талаптарының 23 бұзушылығын анықтағанымен, ресми актіге соның тек 16-сын ғана енгізген. Көрсетілген «қызметі» үшін департамент басшысы оған қызметтік кабинетінде 100 мың теңге ұсынған. Алайда бірнеше күн өткен соң Азамат Бұлдырықов Шымкент қаласы бойынша ҰҚК департаментіне өзі барып, пара алғаны туралы арыз түсірген.

Сот отырысында қос шенеунік те өз кінәларын толық мойындап, істеген істеріне өкінетіндерін білдірді. Олар бас бостандығынан айырудың орнына айыппұл жазасын тағайындауды сұрады. Руслан Тұңғышбаев өз қарамағында алты бала барын, оның үшеуі кәмелетке толмағанын алға тартса, Азамат Бұлдырықов төрт бүлдіршіні мен зейнет жасындағы ата-анасын асырап отырғанын жеткізді.

Жаза тағайындау кезінде сот айыпталушылардың шынайы өкінішін, бұрын сотталмағанын және отбасылық жағдайын ескерді. Дегенмен ТЖБ маманының қылмысты қызметтік антына қайшы жасауы жауапкершілікті ауырлататын мән-жай ретінде танылды.

Сот үкімімен тағайындалған жазалар:

  • Азамат Бұлдырықовқа 2,5 миллион теңге айыппұл салынып, мемлекеттік қызметте белгілі бір лауазымдарды атқару құқығынан өмір бойына айырылды. Сондай-ақ одан «азаматтық қорғау майоры» сыныптық шені алынды;

  • Руслан Тұңғышбаевқа 1,5 миллион теңге айыппұл тағайындалды. Алайда қамауда және үйқамақта отырған уақыты есептеліп, төленетін сома 1 197 250 теңгеге дейін қысқартылды. Оған да белгілі бір лауазымдарды атқаруға өмір бойына тыйым салынды.

Сонымен қатар жәбірленушілерге өтемақы қорына Бұлдырықовтан 86 500 теңге, ал Тұңғышбаевтан 64 875 теңге өндірілді. Пара ретінде алынған 100 мың теңге мемлекет кірісіне тәркіленді.