Қазақстан БҰҰ-ның электрондық үкіметті дамыту индексінде 24-орыннан 16-орынға көтеріліп, алғаш рет ең жоғары рейтингтік класқа енді. Осылайша еліміз Сингапур, Дания және АҚШ-пен бір сатыға тұрақтап, Жапония, Германия және Ресей секілді алпауыттарды артта қалдырды.
БҰҰ баяндамасында сегіз сатыға жоғарылау көшбасшы елдер арасындағы ең айтулы серпілістердің бірі ретінде аталды. Қазақстан - өңірде мұндай биік деңгейге жеткен алғашқы мемлекет.
Ең жоғары рейтингтік класс әлемдегі электрондық үкіметі ең озық 21 мемлекетті біріктіреді. Қазақстан енді Оңтүстік Корея, Дания, Сингапур, Ұлыбритания, Эстония және АҚШ-пен бір топта. 2026 жылы бұл класқа алғаш рет бар болғаны үш ел ғана қосылды: Қазақстан, Ирландия және Польша.
Еліміз 2024 жылы алда тұрған Швеция, Германия, Жаңа Зеландия, Аустрия және Жапонияны басып озды. Әлемдік орташа мән 0,6675 болған тұста, Қазақстанның индексі 0,9009-дан 0,9363-ке дейін өсті.
Соңғы екі жылда цифрлық мемлекеттің эталоны саналатын Эстониямен арадағы алшақтық төрт есеге қысқарды. ТМД мен Орталық Азия елдері арасында Қазақстан тағы да көш бастады. Әлемдік рейтингте Өзбекстан 32-орында, Әзербайжан 38-орында, ал Ресей 50-орында тұр.
БҰҰ сарапшылары еліміздегі байланыс сапасының айтарлықтай ілгерілегенін атап өтті:
-
Мобильді байланыс пен интернеттің қолжетімділігі бойынша Қазақстан әлемде 41-орыннан 13-орынға көтеріліп, телекоммуникациялық инфрақұрылым деңгейі жөнінен Эстониямен теңесті;
-
Цифрлық сауаттылық көрсеткіші шамамен бір жарым есеге артты;
-
Білім беру мен дағдылар деңгейі бойынша ел 42-орыннан 28-орынға шықты;
-
Электрондық үкіметтің құқықтық базасы БҰҰ-ның ең жоғары бағасына ие болды.
Баяндамада Орталық Азия 2026 жылдың басты табыс тарихтарының бірі ретінде көрсетілген. Сондай-ақ eGov.kz және eGov Mobile экожүйесі интеграцияланған цифрлық мемлекеттің үлгісі ретінде, ал alem.ai халықаралық орталығы білім беру, зерттеулер, стартаптар мен қолданбалы жасанды интеллект алаңы ретінде ерекше аталды.