Оңтүстік Кореяның алып әуе компаниясы Қазақстан нарығына шығады: Korean Air алғашқы рейстерді қашан ашады

Редакция
20 қараша 2026, 11:50 12
Оңтүстік Кореяның алып әуе компаниясы Қазақстан нарығына шығады: Korean Air алғашқы рейстерді қашан ашады Сурет авторы: lhsystems.com

Оңтүстік Кореяның ең ірі ұлттық әуе тасымалдаушысы Korean Air Қазақстан нарығына шығуға дайындалып жатыр. Екі ел арасындағы әуе қатынасын кеңейту перспективалары ИКАО-ның әуе көлігі жөніндегі 7-ші дүниежүзілік конференциясы аясында талқыланды.

Қазақстанның Көлік министрлігінің мәліметінше, Korean Air алдымен Сеул – Алматы бағыты бойынша тұрақты жолаушылар рейстерін іске қосуды көздеп отыр. Тасымалдаушы бұл бағыттағы алғашқы ұшуларды 2027 жылдың жазында бастауды жоспарлауда. Сонымен қатар кореялық әуе компаниясы Сеул – Астана маршрутын ашу мүмкіндіктерін де зерделеуге мүдделі.

Бүгінде Қазақстан мен Оңтүстік Корея арасында үш бағыт бойынша аптасына 12 тұрақты жолаушылар рейсі орындалады:

  • Астана – Сеул;

  • Алматы – Сеул;

  • Шымкент – Сеул.

Кездесу барысында тараптар Қазақстан мен Корея Республикасы арасындағы әуе қатынасы туралы үкіметаралық келісім жобасын да пысықтады. Қазақстан тарапы құжатқа қол қоюға толық дайын екенін растады. Аталған келісім екі мемлекеттің авиациялық билік орындары арасындағы ынтымақтастықты нығайтып, әуе рейстерін одан әрі көбейтуге құқықтық негіз қалайды деп күтілуде.