«Самұрық-Қазына» қаржыландырып келген «Астана» футбол клубы жекешелендіріледі: Атышулы клуб қарашаның соңына дейін жекеменшікке өтеді

Редакция
19 қараша 2026, 15:05 7
«Самұрық-Қазына» қаржыландырып келген «Астана» футбол клубы жекешелендіріледі: Атышулы клуб қарашаның соңына дейін жекеменшікке өтеді Сурет авторы: instagram.com/fca.astanа

«Самұрық-Қазына» қоры қаржыландырып келген елордалық «Астана» футбол клубы қараша айының соңына дейін жекеменшікке беріледі. Туризм және спорт министрі Ербол Мырзабосынов клубты жекешелендіру туралы ресми ақпарат алдағы күндері, тіпті келесі аптада жариялануы мүмкін екенін мәлімдеді. Осылайша, осы айдың соңына қарай клубтың жаңа иелері белгілі болмақ. Орталық коммуникациялар қызметінде өткен брифингте министр қазіргі уақытта соңғы келісу жұмыстары жүріп жатқанын жеткізді.

Дегенмен ведомство басшысы футбол клубының нақты кімге бұйыратынын және қандай сомаға сатылатынын құпия қалдырды.

«Бүгін немесе келесі аптада болуы мүмкін — қазір соңғы келісімдер жасалып жатыр, жақын арада «Астана» клубының жекешелендірілгенін жариялаймыз», - деді Ербол Мырзабосынов.

Сонымен қатар министр еліміздегі басқа да футбол командаларын коммерцияландыру барысына тоқталды. Оның айтуынша, бүгінде 13 клуб жекеменшікке өтіп үлгерген, ал қалған 6 клуб 2026 жылдың соңына дейін толықтай сатылымға шығарылып, жеке қолға тапсырылады.

Айта кетейік, отандық футбол клубтарын жекешелендіру мәселесі біраз уақыттан бері күн тәртібінде тұр. 2025 жылдың қыркүйегінде Парламент палаталарының бірлескен отырысында Мемлекет басшысы Қасым-Жомарт Тоқаев бұл жұмысты барынша жеделдетуді тапсырған еді. Сол кезде Президент төрт клубтың танымал кәсіпкерлердің меншігіне өткенін атап өткен болатын.