Ақмола облысындағы жол жөндеуге бөлінген қыруар қаржы неге кері қайтарылды

Редакция
20 қараша 2026, 10:22 14
Ақмола облысындағы жол жөндеуге бөлінген қыруар қаржы неге кері қайтарылды Сурет авторы: depositphotos.com

Ақмола облысының Астрахан ауданында жол жөндеуге жарияланған 1,6 миллиард теңгелік мемлекеттік сатып алудың күші жойылды. Қадағалау органының баспасөз қызметі хабарлағандай, аудандық прокуратура ірі қаржыны жоспарлау кезінде өрескел заң бұзушылықтарды әшкереледі.

Тексеріс барысында белгілі болғандай, миллиардтаған қаражат бөлінген жобаның ең негізгі құжаттары мүлде дайындалмаған:

  • Жобалық-сметалық құжаттама әзірленбеген;

  • Мемлекеттік сараптаманың оң қорытындысы алынбаған;

  • Жұмыс құнына ешқандай экономикалық негіздеме жасалмаған.

Прокурорлық қадағалау актілерінің нәтижесінде 1,6 миллиард теңге сомасындағы мемлекеттік сатып алу рәсімі тоқтатылды. Бұл негізсіз шығындарды болдырмауға және бюджет қаражатының тиімсіз жұмсалуының алдын алуға мүмкіндік берді.

Ал заң талаптарын өрескел бұзғаны үшін аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы тәртіптік жауапкершілікке тартылды. Прокуратура бюджет қаржысының заңды әрі тиімді игерілуін алдағы уақытта да қатаң бақылауда ұстайтынын мәлімдеді.