Қазақстанның Тәуелсіздік күні АҚШ-та аталып өтті: Хьюстондағы мерекеге америкалық шенеуніктер қатысты

Хьюстон қаласында Қазақстан Тәуелсіздік күніне арналған мереке өтті. Шараға Шугар-Ленд қаласының мэрі Кэрол МакКатчен, Хьюстон әкімдігінің өкілдері, АҚШ-тағы Қазақстан елшілігінің дипломаттары және қазақ диаспорасы қатысты.

Бұл мереке тек қазақ қауымдастығының ғана емес, америкалық қоғамның да маңызды оқиғасына айналған. Биылғы жылы іс-шараға 300-ге жуық қонақ жиналды. Жергілікті биліктің белсенді қатысуы – Қазақстан мен АҚШ арасындағы достық қатынастың тек мемлекеттік деңгейде ғана емес, халық арасында да нығайып келе жатқанының дәлелі.

Шугар-Ленд қаласының мэрі Кэрол К. МакКатчен өз сөзінде Қазақстан халқын Тәуелсіздік күнімен құттықтап, Техастағы қазақ қауымдастығының мәдени және қоғамдық өмірге қосқан үлесін ерекше атап өтті.

«Қазақстанды Тәуелсіздік күнімен шын жүректен құттықтаймын. АҚШ пен Қазақстан арасындағы достықты жоғары бағалаймын. Техас Қазақ қорының екі ел арасындағы байланысты дамытып, бизнесті қолдаудағы еңбегі зор. Бүгін мұнда келген адамдардың қуанышты жүзін көріп, барлығының осындай мерекені бірге атап өтуіне куә болу – мен үшін үлкен мәртебе», – деді ол.

Бұл жылы сөздер Қазақстан мен АҚШ басшылары арасындағы соңғы кездесулер аясында айтылып, екі ел арасындағы стратегиялық серіктестіктің халықтық деңгейде де беки түскенін көрсетті.

Қазақстандық диаспораның халықаралық байланысты дамытудағы еңбегін ескеріп, Хьюстон мэрі атынан Техас Қазақ қорының директорына алғыс хат табыс етілді.

Техастағы қазақ қауымдастығы бүгінде АҚШ-тағы ең белсенді және өсіп келе жатқан диаспоралардың бірі. Бірнеше жыл бұрын Хьюстонда екі мыңға жуық қазақ өмір сүрсе, қазір олардың саны бірнеше есеге артқан.

Биыл Хьюстонда жаңа «Степь» бизнес-клубы ашылды. Оның мақсаты — қазақстандық және америкалық кәсіпкерлер мен инфлюенсерлерді біріктіріп, әлеуметтік жобалар мен әріптестік байланыстарды дамыту.

8 жылдан бері Хьюстонда тұрып жатқан Раушан Мұхаметжанова қазақ диаспорасын «тірі организмге» теңеді:

«Біздің тамырымыз – Қазақстан. Діңі – осында келіп, білім алып жүрген жастар. Ал бұтақтары – осында туған балалар. Олардың бәрі де Қазақстанды біледі және өзіне де, Отанына да пайдалы болуға дайын.»

15 жастағы Фатих Мусаб Әділ, Кэти қаласындағы жоғары сынып оқушысы, былай дейді:

«Менің буыным үшін Тәуелсіздік күні – өз мәдениетімізді, тілімізді және болмысымызды сақтау деген сөз. Бұл – өз болашағыңды еркін таңдауға мүмкіндік.»

Хьюстондағы алғашқы қазақ мектебі 10 жыл бұрын ашылған. Алғашында бар болғаны 10 оқушы оқыса, қазір мұнда 70-тен астам бала білім алып жатыр. Балалар қазақ тілін, домбыра тартуды, ұлттық билер мен дәстүрлерді үйренеді.

Мектептің алғашқы түлектері Лаура мен Диана бүгінде АҚШ университеттерінің студенттері:

«Мектеп бізге өз қауымымызды табуға көмектесті, қазақ тілін үйренуге және дәстүрлерімізді бірге атап өтуге мүмкіндік берді. Біз өз мәдениетіміздің бір бөлігі екенімізді сезіндік.»

Кештің ең әсерлі сәті – қазақ мектебі оқушыларының орындауындағы «Рух» патриоттық әні болды. Зал қалың қол шапалаққа бөленді. Домбыра үні шырқалып, қазақ мәдениетін дәріптейтін бейнероликтер көрсетілді.

АҚШ тұрғыны Николас Тай, жұбайы Салтанатпен бірге келген, былай деді:

«Қазақ мәдениетіндегі ең таңғаларлық нәрсе – адамдардың қонақжайлығы мен кең пейілі. Мұндағы достық пен жылылық мені өз отбасымнан да жақынырақ сезіндірді. Қазақ мәдениеті – мен үшін нағыз үй сияқты.»

Omni Flow Computers Inc. компаниясының президенті әрі бас директоры, Шотландия текті бизнесмен Алан Маккартни де Қазақстан мәдениетіне жоғары баға берді:

«Мен үшін және жұбайым үшін бұл ерекше шараға қатысу үлкен қуаныш болды. Мен де иммигрантпын, сондықтан өз мәдениетіңді сақтау қаншалық маңызды екенін түсінемін. Хьюстондағы қазақ қауымы өте ұйымшыл және мықты. Мұндағы балалардың өз мәдениетін ұмытпай өсуі – нағыз мақтаныш.»

Мерекеде басқа ұлт өкілдері де бой көрсетті. Мысалы, әзербайжан диаспорасының өкілі Севинч:

«Мен Кеңес дәуірінде туып-өстім, сол кезде өз тәуелсіздігімізді атап өте алмайтынбыз. Бүгін осында, қазақтармен бірге тәуелсіздікті тойлау – мен үшін үлкен қуаныш. Қазақ халқына мәңгі тәуелсіздік пен өркендеу тілеймін!»

Ал жергілікті тұрғын Айгерім Хьюстонды таңдауының басты себебі – осындағы жылы қарым-қатынас пен ұйымшыл қазақ қауымы екенін айтты:

«Мұнда бәрі бауырмал. Көмек керек болса, бірден жауап беріп, жол көрсетеді. Осындай отбасылық атмосфераға бірден сіңіп кеттік. Хьюстон – нағыз үйіміз!»

Хьюстондағы Қазақстан Тәуелсіздік күні мерекесі тек ресми шара емес, бірлік пен рухтың мерекесіне айналды.
Америкалық шенеуніктердің қатысуы, бизнес өкілдерінің қызығушылығы, жастардың белсенділігі мен білімге деген ұмтылысы – қазақ қауымдастығының АҚШ-та өз орнын тауып, екі ел арасындағы көпірге айналғанының айғағы.

Осындай кездесулер мен бірлікке толы сәттер халықтар арасындағы достық пен өзара түсіністікті нығайтып, Қазақстан мәдениетін әлемге таныта түседі.

? Гаухар Сембаева, Хьюстон (АҚШ)