Қазақстандық спортшылардың XXV қысқы Олимпиада ойындарында киетін экипировкасын Туризм және спорт министрі Ербол Мырзабосынов таныстырды.
«Экипировка жиынтығына ашылу және жабылу салтанаттарына қатысуға арналған парадтық форма, сондай-ақ спорттық іс-шара кезінде киетін жылы сыртқы киімдер кіреді. Сонымен қатар жаттығу жасауға, денені қыздыруға және күнделікті киіп жүруге арналған формалар да қарастырылған», – деді Мырзабосынов үкімет отырысында.
Жиынтық барлығы 22 аталымнан тұрады. Министр спорттық форма бюджеттен тыс қаражат есебінен сатып алынғанын атап өтті.
Айта кетейік, Олимпиада ойындары 2026 жылдың 6-22 ақпан аралығында Италияда өтеді. Қазақстан осы жарысқа дайындық үшін 13,3 миллиард теңге жұмсады.