Қаржы министрлігінің Мемлекеттік кірістер комитеті өзін-өзі жұмыспен қамтыған азаматтардың тіркелуін талдауды бастады. Бұл туралы ведомство өкілдері мәлімдеді.
Тексеріс кейбір компанияның қызметкерлерін штаттан шығарып, оларды өзін-өзі жұмыспен қамтушы ретінде тіркетіп, бұрынғы жұмысын жалғастыруына байланысты қолға алынған. Мұндай жағдайда жұмыс берушілер салық жүктемесін азайтуы мүмкін.
МКК өкілі Ерқанат Шынбергеннің айтуынша, егер адам өзін-өзі жұмыспен қамтыған ретінде тіркеліп, бірақ іс жүзінде бір ғана жұмыс берушіге тұрақты түрде қызмет көрсетсе, бұл жағдай қосымша тексеруді талап етеді.
Мамандардың түсіндіруінше, штаттағы қызметкер мен өзін-өзі жұмыспен қамтыған азаматтың салықтық міндеттемелері арасында айтарлықтай айырмашылық бар.
Қазіргі уақытта комитет талдау жұмыстарын жүргізіп жатыр. Нәтижесінде салық режимдерін дұрыс қолданбағандарға қатысты жауапкершілікті күшейту жөнінде ұсыныстар енгізілуі мүмкін.