17 маусым күні Болгария астанасы Софияда өткен Еуропалық физика олимпиадасы (EuPhO-2025) өз мәресіне жетті. Зияткерлік додада Қазақстан құрамасы үздік нәтиже көрсетті. Ел намысын қорғаған бес оқушының барлығы жүлделі орыннан көрінді.
Астана қаласындағы Республикалық физика-математика мектебінің (РФММ) 10-сынып оқушысы Ілияс Қазымбек олимпиаданың абсолют жеңімпазы атанып, алтын медаль иеленді.
Тағы бір астаналық оқушы – РФММ-нің 10-сынып оқушысы Алтаир Аканов пен Алматыдағы «Miras» халықаралық мектебінің 11-сынып оқушысы Роман Черемнов күміс медаль алды.
Ал «Nurorda» халықаралық мектебінің 11-сынып оқушысы Даниэль Тюлюбаев қола медаль жеңіп алды. Қостанай облыстық «Білім-инновация» лицей-интернатының 10-сынып оқушысы Таир Әбдіқадыр құрмет грамотасымен марапатталды.
Оқушыларды халықаралық және республикалық олимпиадалардың бірнеше дүркін жеңімпаздары – тәжірибелі тәлімгерлер Андрей Сидоренко мен Темірлан Исмагұлов дайындаған.
2024 жылы Қазақстан құрамасы бұл олимпиадада 2 күміс және 2 қола медаль еншілеген болатын.