2024 жылдың ортасында Қазақстандағы жұмыс күшінің 36,4%-ы бейресми жұмыспен қамтылған, деп хабарлады Energyprom.kz Adam Research зерттеу тобына сілтеме жасап.
Олардың 16,6%-ы «сұр» жалақы алған, 13,6%-ы көлеңкелі бизнеспен айналысқан, ал 6%-ының тұрақты жұмысы болмай, әртүрлі жерлерде уақытша жұмыс істеген.
Бейресми жұмыспен қамтылғандардың ең көп үлесі, яғни 30%-дан астамы Түркістан, Алматы облыстарында және Шымкент қаласында тіркелген. Шығыс Қазақстан, Ұлытау және Ақтөбе облыстарында бұл көрсеткіш 20%-дан аспаған.
Бейресми жұмыспен қамтылғандардың орташа табысы 100 мың теңгеге де жетпеген. Дегенмен көлеңкелі бизнестегі табыс ел бойынша орташа көрсеткіштен жоғары болған. «Конвертте» жалақы алатындардың 27%-ы күнделікті қажеттіліктерге қаражат жетіспейтінін мәлімдеген.
Ресми деректерге сәйкес, 2023 жылы Қазақстанда 1,2 миллион адам бейресми жұмыспен қамтылған. Олардың жартысынан көбі ресми экономика секторында еңбек еткен, бірақ еңбек шарттарын жасамаған.