Дулат Абдраманов
Жиында елді мекендегі инфрақұрылым, ауыз су тапшылығы, дәрі-дәрмек жетіспеушілігі мен медициналық қызметтердің қолжетімсіздігі талқыланды.
Ауылда жағдайдың күрделілігін жергілікті тұрғындар ашық айтты. Әсіресе қыста су болмағандықтан, қарды ерітіп пайдалануға мәжбүр екендерін жеткізді. Ауыл әкімі Анатолий Ташниченко мәселені шешіп, 1 қарашаға дейін су қысымын қалпына келтіруге уәде берді.
Сондай-ақ тұрғындар ауруханадағы төсек-орын жетіспеушілігін, қарттарға арналған күндізгі стационардың жоқтығын, жаңа медициналық ғимараттың құрылысы тек 2027 жылы басталатынын сынға алды. Дәрі-дәрмек тапшылығы да өткір көтерілді.
Асхат Рақымжанов ауылда уақытша стационар ашуды, дәрі-дәрмек сатып алу тәртібін қайта қарауды және медициналық қызметтердің қолжетімділігін арттыруды ұсынды.
– Тұрғындар ауыз сумен, дәрі-дәрмекпен және инфрақұрылыммен қамтамасыз етілуін заңды түрде талап етіп отыр. Әкімдік халықтың сұранысына жедел жауап беруге тиіс, – деді депутат.
Ол сонымен бірге Белоусовка тұрғындарының ұсыныстары тиісті мемлекеттік органдарға жолданып, олардың орындалу барысы өзі тарапынан бақылауда болатынын атап өтті.