Абай облысында мерзімді әскери қызмет атқарып жүрген 19 жастағы сарбаз бактериалды менингиттен қайтыс болды. Ол 25 сәуірде Солтүстік Қазақстан облысынан әскерге шақырылған болатын.
Қорғаныс министрлігінің мәліметінше, сарбаз 16 мамыр күні кешке өзін жайсыз сезініп, қызуы көтерілген соң Аягөз әскери госпиталіне жатқызылған. Алғашқы тексерістен кейін ем тағайындалғанымен, жағдайы жақсармаған.
Келесі күні оған қосымша тексерулер – УЗИ мен КТ жасалып, дәрігерлер сарбазды Аягөз қалалық ауруханасына ауыстырған. 18 мамырда жағдайы күрт нашарлап, жансақтау бөліміне түскен. Алайда дәрігерлердің барлық әрекетіне қарамастан, оны аман алып қалу мүмкін болмады.
Қорғаныс министрлігі сарбаздың нақты неден қайтыс болғанын анықтау үшін қылмыстық іс қозғалғанын хабарлады. Қазір тергеу жүріп жатыр.
Құрлық әскерлері қолбасшылығы қайтыс болған сарбаздың туыстарына қайғыра көңіл айтып, оларға барлық қажетті көмек көрсетілетінін мәлімдеді.